ಬೆಂಗಳೂರು: ದಕ್ಷಿಣ ಭಾರತ ಚಿತ್ರರಂಗದಲ್ಲಿ ಬಹುಬೇಡಿಕೆಯ ಪೋಷಕ ನಟಿ ಪವಿತ್ರಾ ಲೋಕೇಶ್ (Pavitra Lokesh). ಸಹಜ ಅಭಿನಯದಿಂದಲೇ ಮನೆ ಮಾತಾದವರು. ಖ್ಯಾತ ರಂಗಭೂಮಿ ನಟ, ಪೋಷಕ ನಟ ಮೈಸೂರು ಲೋಕೇಶ್ ಮಗಳು. ಒಂದು ಕಾಲದಲ್ಲಿ ನಾಯಕ ನಟಿಯಾಗಿ ಚಿತ್ರರಂಗಕ್ಕೆ ಎಂಟ್ರಿ ಆಗಿದ್ದ ಪವಿತ್ರಾ ಲೋಕೇಶ್ ಈಗ ಪೋಷಕ ಪಾತ್ರಗಳಲ್ಲಿ ಹೆಚ್ಚು ನಟಿಸ್ತಿದ್ದಾರೆ. ಸದ್ಯ ಪವಿತ್ರಾ ಲೋಕೇಶ್ ತೆಲುಗು ನಟ ನರೇಶ್ (Naresh) ಜೊತೆ ಎರಡನೇ ವಿವಾಹ ಆಗ್ತಿದ್ದಾರೆ ಎನ್ನಲಾಗ್ತಿದೆ. ಈ ಬಗ್ಗೆ ತೆಲುಗು ಮಾಧ್ಯಮಗಳಲ್ಲಿ ಸುದ್ದಿ ಆಗ್ತಿದೆ. ಈಗಾಗಲೇ ನರೇಶ್ 3 ಮದುವೆ ಆಗಿದ್ದು, ಇದು ಅವರ ನಾಲ್ಕನೇ ಮದುವೆ ಅನ್ನುತ್ತಿದ್ದಾರೆ.
ಒಂದಷ್ಟು ಸಿನಿಮಾಗಳಲ್ಲಿ ನರೇಶ್ ಮತ್ತು ಪವಿತ್ರಾ ಲೋಕೇಶ್ ಪೋಷಕ ಪಾತ್ರಗಳಲ್ಲಿ ಒಟ್ಟಿಗೆ ನಟಿಸಿದ್ದಾರೆ. ಇದೇ ವೇಳೆ ಇಬ್ಬರ ನಡುವೆ ಸ್ನೇಹ ಶುರುವಾಗಿದೆಯಂತೆ. ಇಬ್ಬರು ಲಿವ್ ಇನ್ ರಿಲೇಷನ್ಶಿಪ್ನಲ್ಲಿ ಇದ್ದಾರಂತೆ. ಶೀಘ್ರದಲ್ಲೇ ಮದುವೆ ಆಗಲು ಮನಸ್ಸು ಮಾಡಿದ್ದಾರೆ ಅಂತೆಲ್ಲಾ ಗುಸಗುಸು ಕೇಳಿಬರ್ತಿದೆ. ಈಗಾಗಲೇ ಪವಿತ್ರಾ ಲೋಕೇಶ್ ಕನ್ನಡ ನಟ ಸುಚೇಂದ್ರ ಪ್ರಸಾದ್ ಜೊತೆ ವಿವಾಹವಾಗಿದ್ದಾರೆ. ಈಗ ಪವಿತ್ರಾ ಲೋಕೇಶ್ ಮತ್ತೊಂದು ಮದುವೆ ಆಗ್ತಿದ್ದಾರೆ ಅನ್ನೋದನ್ನ ಕೆಲವರು ಒಪ್ಪಲು ಸಿದ್ಧರಿಲ್ಲ. ಇತ್ತೀಚೆಗೆ ನರೇಶ್ ಮತ್ತು ಪವಿತ್ರಾ ಮಹಾಬಲಿಪುರಂನಲ್ಲಿ ಸ್ವಾಮೀಜಿ ಒಬ್ಬರನ್ನು ಭೇಟಿ ಮಾಡಿ ಬಂದಿದ್ದಾರೆ. ಅಂದಿನಿಂದ ಇಬ್ಬರು ಮದುವೆ ಆಗ್ತಾರೆ ಅನ್ನೋ ಚರ್ಚೆ ಸೋಷಿಯಲ್ ಮೀಡಿಯಾದಲ್ಲಿ ಶುರುವಾಗಿದೆ.
ಖ್ಯಾತ ನಟಿ ವಿಜಯ ನಿರ್ಮಲಾ ಪುತ್ರ ನರೇಶ್. ಸಾವಿರಾರು ಕೋಟಿಯ ಒಡೆಯ. ಬಾಲ ಕಲಾವಿದರಾಗಿ ಚಿತ್ರರಂಗಕ್ಕೆ ಬಂದ ನರೇಶ್ ನಂತರ ಹೀರೋ ಕೂಡ ಆದರು. ಸದ್ಯ ಪೋಷಕ ಕಲಾವಿದರಾಗಿ ಬ್ಯುಸಿಯಾಗಿದ್ದಾರೆ. ಸದ್ಯ ತೆಲುಗು ಮಾಧ್ಯಮಗಳಲ್ಲಿ ತಮ್ಮ ಮದುವೆ ಬಗ್ಗೆ ಚರ್ಚೆ ಆಗುತ್ತಿದ್ದರೂ ಇಬ್ಬರೂ ಪ್ರತಿಕ್ರಿಯಿಸುವ ಗೋಜಿಗೆ ಹೋಗಿಲ್ಲ. ಈ ಸುದ್ದಿ ನಿಜವೋ ಸುಳ್ಳೋ ಅನ್ನೋದರ ಬಗ್ಗೆ ಅವರೇ ಸ್ಪಷ್ಟನೆ ನೀಡಬೇಕಿದೆ.
